Manjangkon Jesus dohot HataNa, ido na dapotan di hangoluan na manongtong

Bahan Sermon, Johannes 6:55-65

Andorang so turpuk on, torop do angka tanda halongangan pinatupa ni Tuhan Jesus. Tarlobi di bindu onom on, adong dua tanda halongangan i:

–        Disarihon Jesus sipanganon pardagingon ni na torop na paihutihut ibana marhite lima roti dohot dua dengke.

–        Mardalan Tuhan Jesus di atas tao mandapothon angka sisean i.

–        Dijoloani Tuhan Jesus angka siseanNa i tu bariba tao (6:25, Guru, sadihari do Ho ro tuson?).Sasintongna tangkas do diboto angka siseanNa i dohot angka na torop i pambaen ni

Jesus on, alai ndang haru porsea nasida. Ndang pola adong pangalaho na imbaru sian angka sisean i dohot angka na torop i dung mamereng angka halongangan i. Sai tong do pe di pangantusion na somal i nasida mamereng hadirion ni Tuhan Jesus songon jolma sambing. Tarida do i sian sungkunsungkun ni sisean i: ‘Asa dia ma tanda bahenonMu siidaonnami, asa tung porsea hami di Ho? (30). Dungi muse: Guru, sadihari Ho ro tuson? (25). Ndang dapot rohanasida dope na so boi ambatan ni partingkian dohot inganan hadirion ni Tuhan Jesus. Nang pe naung dua hali sisean i marnida tanda halongangan na pinatupa ni Jesus, alai tong dope nasida ndang boi mangalapatani tanda i. Molo pinamanat hata ni Jesus di ayat 26, boi dohonon hata na koras do on: “Na tutu situtu do na hudok on tu hamu: Dilului hamu pe Ahu, ndada ala naung dapot rohamuna tanda i, tung ala ni na bosur i do hamu, na mangan roti I”.

Di panghataion ni Tuhan Jesus dohot angka sisean i tangkas do tarida na so hibul do pe panandaonnasida di hadirion ni Tuhan Jesus songon Anak ni Debata na ro sian banua ginjang na sinuru ni Ama i. Nunga leleng nasida rap dohot Tuhan Jesus alai sahira na so adong do diida nasida na binahen ni Debata, hira na so adong do pangkorhon na tu na lam tamba ni haporseaon nasida. Mangido tanda dope nasida sian Tuhan Jesus, nang pe nunga torop angka tanda pinatupa ni Jesus. Dipangido nasida do asa dipatuduhon Tuhan Jesus songon tanda na hea binahen ni si Musa parohon roti sian banua ginjang manarihon sipanganon ni ompunasida uju di parhorsihan. Alai, tangkas do alus ni Tuhan Jesus tu angka siseanna i: ‘’Na tutu do hatangkon tu hamu: Apala si Musa mangalehon tu hamu roti na sian banua ginjang; Damang i do mangalehon di hamu roti na tutu, na sian banua ginjang” (ay. 32). Roti na tutu na nidok ni Jesus ima martudutudu tu diriNa. Jesus do roti hangoluan. “Ahu do roti hangoluan i: sandok na so male be manang ise, naung ro tu Ahu; jala na so tupa be mauas manang ise, na porsea di Ahu”. (ay. 35).

Di ayat 58 dipatorang do haimbaron ni roti na pinangan ni bangso Israel uju di parhorsihon. Ndang sipanganon na mangkorhon ngolu saleleng ni lelengna anggo i, ala tong do mate nasida. Na nidok na, ia sipanganon manna i, sipanganon pardagingon do i. Alai,  roti na sian banua ginjang ima diri ni Tuhan Jesus, ido sipanganon na manongtong, jala na mangkorhon tu hangoluan saleleng ni lelengna. Ala nang pe mate angka na manganhon daging ni Jesus i, alai paheheonNa do di ari parpudi, asa bongot tu hangoluan na manongtong i. Naeng dohonon, Jesus sandiri do hangoluan i, di bagasan diriNa do hagogoon ni Debata laho paluahon na porsea di Ibana, jala na manjangkon hataNa. Siala ni i na nidok ni Jesus, angka na manganhon dagingNa dohot manginum mudarNa ima angka na mangulahon hataNa, mangaradoti patikNa dohot manghaholongi Jesus di ngoluna.

Usul boanon tu jamita:

1. Sarihonon ni Debata do hangoluan na manongtong tu halak na manjangkon Jesus di ngoluna. (Joh. 3:15-16; 3:36; 4:14; 5:24; 6:35, 47, 51; 11:25)

2. Unang ma holan ngolu pardagingon sarihononhon alai na rumingkot manarihon ngolu partondion. (Mat. 6:33; 16:26)

3. Naeng ma mangolu roha holong di ngolu ni halak na manjangkon Jesus. (Joh. 13:35; 14:23; 15:9-10

4. Margogo do hata ni Jesus manulingkit roha ni jolma. Di angka na so porsea boi targasip, alai di angka na porsea lam patubu panghatindanghonon na sintong. Songon pangkatindangkonon ni si Petrus: Tung tu ise ma hami laho, ale Tuhan? Di Ho do hata hangoluan sisalelenglelengna! Jala nunga huhaporseai jala hutanda hami: Ho do na badia ni Debata! (ayat 68-69). Dungi marguna do hata ni Debata patureturehon hangoluan na badia (2 Tim. 3:16). 

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout /  Ubah )

Foto Google+

You are commenting using your Google+ account. Logout /  Ubah )

Gambar Twitter

You are commenting using your Twitter account. Logout /  Ubah )

Foto Facebook

You are commenting using your Facebook account. Logout /  Ubah )

Connecting to %s