Jamita Epistel 25 Juli 2010

Marhaposan tu Debata manang tu sinamot?

’Mangunsande tu hau na bolon manang na metmet?’

EP: Psalm 49:2-14

  1. Dijouhon psalmen on sude jolma di portibi on asa paelengkon pinggolna tumangihon poda ni Debata. Ima sude angka bangso, sandok pangisi ni hasiangan on. Suang songon i sude jolma sian horong ni situan natorop, raja, halak na mora dohot na pogos pe. Tu sude jolma do marlangku poda sian hata ni Debata. Ndang marimbar bangso dia pe. Tu sude horong do ringkot hata ni Debata, ndang marimbar na mora dohot na pogos, na sangap nang na lea, raja manang hatoban, baoa manang boruboru, dakdanak nang na toras. Ndang adong na so mangkaringkothon hata ni Debata. Ai dihatindangkon parpsalmen do: HataMi do sulusulu ni pathu jala hatiuron di dalanku (119:105). Lilu jala matinggang do jolma na so mangharingkothon hata ni Debata. Asa unang lilu jala tinggang di ngoluna, dipaeleng ma pinggolna dompak Debata, asa dapotan habisuhon dohot hapistaran ibana sian hata ni Debata. Ido na ni sinoarahon ni hata ni Debata di turpuk on.
  1. Halak na marhaposan tu Debata ndang adong sihabiaranna di portibi on, ala, Debata do hagoonna, jala parsigantunganna. Ndang jadi ganggu rohana, ala Debata do manarihon na ringkot di ngoluna. Halak na mangkaposi Debata, sai na denggan do parbue ni ngoluna, ala ditorangi hata ni Debata ibana tongtong. Jadi, tung togu situtu do ngolu ni halak na marhaposan tu Debata. Songon pandohan ni hita Batak: ’Songon na mangunsande tu hau na bolon, hot hajongjonganna.
  2. Pos situtu do roha ni halak na marhaposan tu Debata. Diondihon do, asa unang tahutan jala mabiar molo tung songgop tu ibana ari parhinamagoan; hari-hari celaka yang menakutkan dan menyesakkan; nang tompu hinaliangan ni hajengkelon ni angka na mangarupa ibana; dikepung oleh kejahatan pengejar-pengejar. Jala parbisuhan ni Debata do halak na marhaposan tu Debata, asa unang mabiar tondina mangadopi angka na mora na mangkaginjangkon hamoraonna dohot angka na sangap na mangkaginjangkon hasangaponna, suang songoni sude halak na marhaposan tu sinamotna. Holan idaon tama do sasintongna halak na marhaposan tu sinamotna manang artana. Alai, molo di adopan ni Debata, tung so marlapatan do ngolunasida. Naeng do di roha nasida tuhoronna haluaon ni tondina sian sian Debata marhite artana (’…memberikan tebusan kepada Allah ganti nyawanya). Dirimpu nasida do mangolu nasida saleleng ni lelengna di portibi on marhite na marhaposan tu artana. Naeng do di roha nasida pasidingkon tanomanna binahen ni gogo ni sinamotna.
  3. Halak na marhaposan tu sinamotna, dipatudos do i tu halak na mangasahon haotoona. Dirimpu ibana boi paluahon tondina sinamotna i, baliksa pamauphon dohot mangagohon ibana do i molo marhaposan ibana tusi. Hea do didok Tuhan Jesus, tu sahalak na mora na marhaposan tu sinamotna, pandohan: ’E na loahon’. ”E ho na loahon! Saborngin on ma tungguon hosam sian ho. Ia na pinaradem, tu ise ma i? Songon i ma masa di halak, na papunguhon arta di dirina, anggo so mamora ibana di Debata’ (Luk. 12:20-12). Molo ondo na masa, nda paholangkon dirinta sian Debata do sinamot i? Hape na laho salpu do sinamot, alai na hot do ianggo hata ni Debata.
  4. Ndang tarbahen ni manang ise manambai ariari ni ngoluna marhitehite sinamotna, artana songoni nang hamoraon dohot sangapna pe. Alani i, ingkon padaoon do roha dohot ngolu na marhaposan tu si. Ingkon holan tu Debata do hita marhaposan. Holan Debata do na boi pagandahon ariari ni ngolunta. Ia arta, sinamot, hamoraon, hasangapon manang dia pe i na adong di diri ni jolma i, silehonlehon jala parhitean do i. Asa jumolo ma tajalo bisuk dohot hapistaran sian Debata, asa sai tu Ibana hita marhaposan. Asa unang marisuang angka sinamot na di hita i, godang manang otik pe i.
  5. Di ajal ni portibi on, rap marujung do sude ngolu ni angka jolma. Didok marmatean do angka na bisuk i, rap mago do na oto dohot na londongon, manadingkon sinamotna. Rap manuju tanoman do daging ni sude jolma. Ndang adong na manahan ro di saleleng ni leleng na di portibi on. Alai adong do parasinganna. Angka halak na marhaposan tu sinamotna ndada tu Debata, didok: ‘Sobokkon birubiru do nasida dipabara tu banuatoru, hamatean do marmahan nasida, jala rajaan ni angka na tigor roha i ma nasida di na sansogot i, turtaran ni banuatoru ma pinangasahonnasida i, gabe ndang adong be inganannasida. ‘Seperti domba mereka meluncur ke dalam dunia orang mati, digembalakan oleh maut; mereka turun langsung ke kubur, perawakan mereka hancur, dunia orang mati menjadi tempat kediaman mereka’ (Ay. 15). Alai, di angka na marhaposan tu Debata, didok: ‘Alai anggo tondingki, sai tobuson ni Debata do sian tangan ni banuatorui, ai jangkononna do ahu. ‘Tetapi Allah akan membebaskan nyawaku dari cengkeraman dunia orang mati, sebab Ia akan menarik aku. (ay. 16). Diujung na, dapotan haluaon do halak na mambahen Debata Haposan di ngoluna. Tajagahon ma asa unang tabahen sinamot gabe haposan di ngolunta, alai tapangke ma gabe parhitean ni Debata. Amen!

2 thoughts on “Jamita Epistel 25 Juli 2010

  1. ahab 22 Juli 2010 / 4:40 pm

    mauliate amang, nunga mantappp be i
    molo boi amang, jamita minggu pe nian bahen amang ma..

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s