Mangoloi Debata marhite hamoraon

Bahan Sermon Distrik XXI Jakarta-3
Senin, 21 Juni 2010

Refleksi tu Jamita Minggu 11 Juli 2010
Jakobus 5:1-6

1. Ringkot do hamoraon. Molo tapamanat ngolu ni jolma di portibi on, tontu sude do mangkaringkothon arta, isarani hepeng, sere, mutiha, intan, undungundung, investasi, mobil, dna, sandok sude do jolma mangharingkothon hamoraon. Halak na porsea manang tadok ma jo halak Kristen ndang marimbar sian jolma na asing, tongtong do diharingkothon hamoraon. Ringkot do di halak na porsea arta, hepeng sahat tu na gabe mamora ibana. Jala marhite hepeng dohot artana i do ibana manggohi jala pasauthon ngoluna di portibi on. Ima ngolu na marrumang haporluan (kebutuhan) fisikal (primer, sekunder, tertier, lux), songon i nang kebutuhan sosial kultural (paradaton), dohot haporluan (kebutuhan) partondion (koinonia, diakonia dohot marturia), isarani, di parmingguon dohot di partangiangan wijk, tapatupa do na papungu pelean, jala masa do tolu sahat tu opat hali marpelean molo di parmingguan. Sandok ringkot do mararta jala marhepeng hita sahat tu na gabe mamora. Molo di tingki balga sidabudabuan na tasangkapi, tontu godang ma hepeng taharingkothon. Sialani i ringkot do na papunguhon hepeng godang. Ndang adong na sala di halak na papunguhon hepeng godang. Na sala ima molo humolongan rohana di arta dohot di hepeng na pinapunguna i. ‘Ai urat ni nasa hajahaton do roha na holongan di hepeng; i do disangkapi na deba, umbahen na lilu sian haporseaon i, gabe diaithon do godang na bernit tu dirina’ (1 Tim. 6:10).

2. Sian Debata do hamoraon i. Tung so tarbahen jolma i do paadonghon hamoraon di ngoluna sian dirina sandiri. Sian Debata do hamoraon i. Alani i ndang patut jolma i paburnang dirina di jolo ni donganna jolma, tarlobi di jolo ni Debata na sangap i. Baliksa, ingkon lam unduk jala lam toruk do sasintongna roha ni angka halak na mora i di jolo ni Debata ala gumodang nasida manjalo, mandai, jala mamangke hamoraon ni Debata. Ndang gabe sabalikna, manghilala nasida sumurung sian donganna jolma, ujungna tubu ginjang ni roha, jala na jumorbut maradophon Debata pe gabe neang rohana. On do na sala. On do na pininsang ni si Jakobus di turpuk on. Molo on do na masa, didok si Jakobus, tagamon ‘tumatangis jala mangangguhi nasida managam haporsuhon, na naeng songgop tu nasida’ (ay. 1). Molo on do na ingkon masa hape, tumagonan ma unang mamora iba. ‘Sai nirimpu parhunihan, hape pargadongan, sai nirimpu parsaulian, hape hamagoan. Saleleng so tarjalo roha ni jolma i, ia hamoraon i sian Debata, manang boha pe ndang gabe parsaulian hamoraonna i, baliksa gabe hamagoan do i. Naeng rajuman ni sude halak na porsea molo sian Debata do hamoraon i, naeng ma pangkeon i tu lomo ni roha ni Debata pasauthon sangkap ni Debata, patimbulhon harajaonNa dohot pasangaphon Debata. Unang do sabalikna, dipangke laho patimbulhon hasangaponna, alai gabe paoruhon hasangapon ni Debata; goar ni na mora i tarbarita, alai Goar ni Debata gabe holip. Molo adong pe sian halak na porsea i, boi pasahathon peleanna na balga, unang ma didok rohana sian gogona i, alai ingkon rajumanna do i, songon kesempatan na tu ibana sian Debata, alani i ingkon dohononna mauliate tu Debata ala diloas Debata dope ibana pasahathon i.

3. Hamoraon padengganhon hangoluan. Hea do ra tabege pandohan OKB ima Orang Kaya Baru. Molo ni bahasa batakhon : ‘Halak na imbaru mamora’. Molo tapamanat pangalaho ni halak on, godang do na so boi mamboanhon dirina mamangke hamoraonna i, ujung na gabe tubu ginjang ni roha, paburnang diri, jala na humansit do pe gabe sasaran ni angka parjahat, ala ndang suman pamboanhononna. Tontu, ndang gabe padengganhon ngolunta be disi hamoraonta i, baliksa gabe paoruhon sangapta do. Songon halak kristen ingkon paradeonta do dirinta manjalo hamoraon. Lapatanna, ingkon tapasomalsomal do dirinta manjalo hamoraon asa unang gabe sala mamangke hita di hamoraon na sahat tu hita. Tontu, dihalomohon Debata do halak na porsea i mamora. Rade do Debata manumpahi angka na porsea, asa mamora be di arta. Ai na mora do Debatanta, ‘Gok di Jahowa do tano on ro di isina, portibi on dohot pangisina’ (Psalm 24:1). Alani i ingkon jumolo do paradeonta dirinta manjalo hamoraon i, asa unang tarsonggot, ujungna tarontohon gabe so diboto boha mamangke dohot denggan. Dungi di angka na naeng mamora diharinggashon ma mulaulaon, dihaburjuhon jala dihabengethon ma ulaon na sahat tu ibana. Na dumenggan ingkon boi do diparhaseang angka na porsea i artana, hepengna sandok hamoraonna, marhite na boi pasauthon dohot manggohi angka na ringkot di ngoluna siganup ari jala huhut mangurupi angka dongan jolma. Denggan do na papunguhon arta, alai ingkon sipasidingon do pangalaho na pagukguk arta molo gabe tu hamagoan ni iba sandiri dohot na mamangke hamoraonna i mangagohon dongan jolma. Ingkon pangkeon ni halak na porsea i do artanta manang hamoraon i manarihon dohot paturehon ngoluna tujoloan on, asa ummuli jala dumenggan sian ari sadari on. Ingkon gabe padengganhon ngolunta do hamoraon na di hita i, ndang gabe paoruhon nilai ni dirinta di jolo ni jolma tarlumobi di jolo ni Debata.

4. Hamoraon parhitean di angka na porsea. Sasintongna holan di halak na mangolu do ringkot hamoraon. Lapatanna, di tingki ngolu di portibi on do ringkot di hita hamoraon i. Molo dung mate jolma i, ndang boi be pangkeonna hamoraonna i, tading do sudena i. Ndang adong be kesempatan di ibana, mamangke hamoraonna i, tu hasangapon ni Debata. Hape molo tapamanat boi dohonon gumodang do kesempatanta patuduhon holong dohot pangurupionta marhite hamoraonta i. Manang dohonon, gumodang do hamoraon i parhiteanta mangoloi lomo sangkap halomoan ni Debata. Alani i, ingkon marusaho do angka na porsea i, mamangke hamoraonna songon parhiteanna patuduhon haporseaonna tu Debata. Marhite na songon i do halak na porsea i, boi mangkilala mangolu dibagasan haporseaon tu Tuhan Jesus. Tongon do turpuk jamita on di Minggu Parolopolopon ni hurianta, marningot naung 70 taon hurianta HKBP manjujung baringinna (mandiri). Molo tapamanat do ngolu ni parhuriaonta, nunga tung godang angka ruas ni hurianta angka na pistar, na maju dohot angka na mora. Tontu, sihalashononhon ni hurianta do on. Alai, naeng ma hamoraon, hapistaran dohot hamajuon i gabe parhitean ni ruas ni hurianta patuduhon na lam tu torasna haporseaonta mangihuthon jala mangoloi huhut pasauthon sangkap hatuaon ni Debata. Molo tapahombar di tingki parpudi on, manghirim do angka huria na deba, di angka pangurupion ni ruas ni hurianta angka na mora. Sada kesempatan do on, dilehon Tuhan i, laho mamangke hamoraon i mangurupi nasida. Ndang be sai mamingkirhon holan di huria i sandiri, alai denggan do molo mangaranap laho pangurupi angka huria na ringkot siurupanta, tarlumobi di na paulihon bagas joro, bagas huria dohot angka haporluanna. Jala dipigapiga huria di bona pasogitta, adong dope na so tuk mambalanjoi pangulana.

5. Pasupasu manang haporsuhon. Dua do gondangna mamangke hamoraon, ima manghorhon pasupasu manang parohon haporsuhon. Tontu, di angka na denggan jala sintong mamangke artana manang hamoraonna, manghorhon pasupasu do i tu ibana. Molo buas do ibana jala ni onjar ni haporseaonna mamangke hamoraonna, tumpahan ni Debata ma ngoluna. Dos do i songon pandohan ni halak Batak: ’Songon mandanggur batu tu dolokdolok, ni danggur sada, masursur godang tu toru, manang ’buang buang ganda, lam ni buang lam marganda’. Lapatanna, dihilala namora i do, hinorhon ni pamangkena di hamoraonna i. Manghorhon las ni roha tu dirina, tu keluarga, dohot tu sude halak na humaliangna. Sandok dihilala ibana do panghorhon ni hamoraonna i. Alai, di angka halak na mamangke hamoraonna, jabatanna dohot huasona mamongkihi na pogos, na gale, jala na so mardihadiha, jaloonna do muse jambarna sian Debata, ima haporsuhon. Jala jaloon ni saluhut halak do uhuman sian Debata, molo dipasuasaehon ibana hamoraonna jala dipangke paleahon Debata. Alani i, ingkon sipadaoon do na mambahen hamoraon gabe pusok manang dasor ni ngolu ni halak kristen. Ndang hamoraon i manontuhon ngolu ni hakristenonta, alai, Debata do na manontuhon jala dasor ni haporseaonta mangolu di portibi on (Pil. 4:13).

Iklan

3 respons untuk ‘Mangoloi Debata marhite hamoraon

  1. Ranto H Tambun 5 Juli 2010 / 2:37 am

    bagus ba anggia, torus ma manurat. Molo pe di hatai dison sai hira na mamburai na mora, ndang na anti hamoraon hita nang halak Kristen. Alai na sala ima moo dipangke do hamoraon i tu marlomolomo, manang gabe manusai halak, ima na marje nanidokna i. Mamora ma hita luhut ai, unang gabe mangholit, tapasangap ma Debata marhite sinadongan na adong di hita. Ai memang sude do hita boi mamora, Selamat manurat ate.

  2. Elumbantoruan 10 Juli 2010 / 4:30 am

    Songon na hurang pas tu thema ni minggunta on Amang, ai di almanak tai themana “Mangauhon Pangoloion ni Tuhan Jesus”

    • Parjumpanganta [Pdt. Singhan Pardede] 13 Juli 2010 / 5:37 am

      Saurdot do i amang. Molo taoloi Debata marhite na mamangke artanta (hamoraonta) dohot denggan, naung mangauhon pangaloion di Tuhan Jesus do i.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout /  Ubah )

Foto Google+

You are commenting using your Google+ account. Logout /  Ubah )

Gambar Twitter

You are commenting using your Twitter account. Logout /  Ubah )

Foto Facebook

You are commenting using your Facebook account. Logout /  Ubah )

Connecting to %s