Jou ma Debata jumpa tarunjun

Jakobus 1:12-16

I. Patujolo

Molo ni sulingkit Surat Jakobus on dapot hita do dibagasanna angka poda na praktis taringot tu ngolu hakristenon. Isarani, taringot tu hamoraon, hasangapon, arta, pangunjunan, parange na denggan, habisuhon, ginjang ni roha, toruk ni roha, hadomuan ni pambahenan dohot haporseaon, hasabaron dohot ngolu tangiang, dna. Alai, molo tarongkon Surat Jakobus on, naeng patoranghon boha do asa saurdot haporseaon dohot pambahenan na denggan (hubungan iman dan perbuatan).

II.  Hatorangan ni turpuk

1. Martua do halak na tau jala na holong roha di Debata!

Tontu martua molo di hata Indonesia didok berbahagia. Somalna halak na martua mangihuthon parnidaan ni portibi on ima, molo las rohana, sonang ngoluna, godang artana, torop pinomparna, jala sangap di jolo ni halak. Dungi nambura dapotan silehonlehon, nambura mangoli/muli somal do didok martua, na marulang taon, na mamasuhi bagas, naung sorang anakhon/ paabing pahompu, naung ditodo gabe calon sintua dohot manjalo tohonan sintua (Parhalado partohonan), dna. Sandok, suhatsuhat ni hatuaon i, hasonangan, ndang parungkilon. Tontu, ndang denggan jala ndang maradat molo didok ’Martua ho ala dapotan parungkilon’; martua ho ala gok hosommu; martua ho ala monding amantam/inantam; manang martua ho ala marpogos’, dna.

Adong dua rumang pangantusion ni hata martua. Na parjolo, martua ala (nunga) dapotan silas ni roha/pasupasu di hatiha i. Na paduahon, martua ala naeng jaloonna ma angka silas ni roha tu joloan on. Molo didok ’Martua do halak na manaon di pangunjunan i’, patoranghon na mangadopi pangunjunan do ibana disi, mangadopi parungkilon, jala dokdok sitaononna. Alai, dapotan hatuaon do ibana muse (manang tardok do ibana martua) molo tau ibana di pangunjunan i. Lapatanna, molo manahan do halak na porsea i di angka pangunjunan dohot parungkilon, pasti do dapotan hatuaon ibana. Ala jaloonna ma tumpal hangoluan na pinarade jala na pinarbaga ni Debata tu angka na satia, na monang dohot angka na holong roha di Debata.

Pandohan martua dison, ima jaloonna ma hasonangan, tumpal hangoluan sian Debata, (ndang sian portibion), molo nunga tau ibana (sudah tahan uji), nunga monang ibana maralohon pangunjunan i, jala tongtong holong rohana nang pe godang mangadopi parsualan di ngoluna.

2.   Ndang diunjuni Debata jolma tu hajahaton!

Adong do manang na piga ayat na manurathon pangunjunan sian Debata, ima di Padan na robi tu si Abraham:‘…diunjuni Debata ma si Abraham…’ (Allah mencoba Abraham) 1 Musa 22:1; tu si Job: ‘…jala ganup tongkin diunjuni Ho ibana? (Kauuji setiap saat) Job 7:18 ; tu Parpsalmen: ‘Ai nunga diunjuni Ho hami, ale Debata, (Engkau telah menguji kami) Psalm 66:10. Di Padan na imbaru: ima di 1 Korintus 10:13 ‘Holan pangunjunan na patut di jolma do naung mangonai tu hamu. Haposan do Debata, ndang loasonna hamu unjunan lobi sian gogomuna; Ibana na parohon pangunjunan i, laos Ibana do mambahen hapateanna, asa tartaon hamu.

Alai di hata Indonesia ndang ondol disurat na sian Debata manang ndang pangunjunan i, ala di bagasan hata passif do di surathon ‘dicobai’. Ai disurathon songon on: ‘…pada waktu kamu dicobai Ia akan memberikan kepadamu jalan ke luar, sehingga kamu dapat menanggungnya. Di Alkitab terjemahan BIS: ‘Pada waktu Saudara ditimpa oleh cobaan, Ia akan memberi jalan kepadamu untuk menjadi kuat supaya Saudara dapat bertahan’. Di Hata Inggris pe ndang didok na sian Debata pangunjunan i (‘…at the time you are put to the test, he will give you the strengt’).

Na naeng idaonta sian ayat on, molo diunjuni Debata pe jolma i, ndang “pangunjunan” songon na taantusi na nidokna disi. Dos do i, molo naeng daionta sipanganon na ni lompa ni donganta, dohononta do: “Buat jo tu son lompalompami bah! Na marlapatan, naeng mandai do i. Ndang na mangunjuni donganta i hita disi. Molo di hata Heber, hata “diunjuni” ima sian hata: nissa, di hata Gorik: persmon/perason. Na marlapatan: manguji, paiashon, manesting, mambaen latihan, pasomalhon; di hata Inggris: to test, tested. Songon na pinatupa ni pangajari tu angka parsingkola, laho mandodo olat ni dia ma naung binotonasida. Sian pangantusion hata manguji botoonta ma na boi do masa ujian manang latihan i manang na piga hali, asa lam tangkas diantusi, asa gabe somal, jala gabe mura ma diulahon. Molo sai jotjot latihan/ujian, gabe mamora ma di pengalaman, adong hatauon, jala dapotan bisuk ma mangadopi ragam ni parungkilon. Sandok, ndang adong sangkap ni Debata mangunjuni hita asa tu parmaraan ni daging nang tondi pe.

3. Sangkap na roa sian jolma i do pangunjunan na tu ibana

Antong sian dia do ro pangunjunan tu hajahaton i? Alusna sian diri ni jolma i do ro pangunjunan tu hajahaton. Didok: ’Alai ditaiti jala dipaelaela sangkapsangkap ni rohana sandiri do ganup, umbahen na tarunjun. Jadi dung manjangkon sangkapsangkap ni roha i, ditubuhon ma dosa; alai dung gok dosa i, ditubuhon ma hamatean. Sian on ma tangkas taboto, ia pangunjunan i hape sian rohanta sandiri do, sian sangkap na roa na tubu di diri ni jolma i. Songon jolma, tontu godang do angka sangkapna. Adong do na marsangkap gabe mamora, marsangap, marhagabeon. Sandok godang do na manait tu roha angka na adong di hasiangan on. Tarlumobi ma molo marhadomuan tu ngolu siganup ari, manggohi siubeon marhite sipanganon dohot siinumon ganup ari. Manggohi ngolu ni keluarga, mamingkirhon parsingkolaan ni anakhon, manggohi kebutuhan sosial paradaton, dln. Taharingkothon do saluhut na on, ndang adong na so mangharingkothon i. Ala dipajamot hita, asa marhite sangkapsangkapta dohot hagiot ni dagingta, asa unang tubu angka sangkap na roa. Alai ditaiti jala dipaelaela sangkapsangkap ni rohana sandiri do ganup, umbahen na tarunjun. Isarana, 1 Tim. 6:9 Ia angka na naeng gabe mamora, madabu do tubagasan pangunjunan dohot sambil dohot tu lan hahisapon haotoon, angka na mangago, na mangalonongkon jolma i tubagasan jea dohot hamagoan. On ma bonsir ni pangunjunan na tu hita mambahen madabu hita tu bagasan dosa, ujung na tu hamatean ni partondion Alai naeng ma nian hita, boi mangorom roha, manahan diri jala ndang humolongan tu portibi on sian tu Debata.

4.   Unang ma hita lilu!

Tangkas do pamerengan ni si Jakobus marnida angka na masa di portibi on. Dungo do rohana manghilala godang ni angka pangunjunan di hasiangan on. Nang hita pe taida jala tangkas do tahilala bahat ni angka pangunjunan i, sian dirinta, sian na humaling hita dohot ujian na sian Debata. Alai dipajamot turpuk on do hita asa unang lilu di angka na masa i. Ingkon tangkas do di hita dia angka na denggan jala na patut pujion ni Debata. Unang rambuse tabahen ngolunta, ala disi do gabe so manahan jala ndang tau hita di angka parungkilon na songgop tu hita.

Asa unang lilu tontu, ingkon adong panangkasion na sintong dohot parsitutuon mananda sangkap ni Debata. Asa unang lilu, tontu ingkon adong do ’rambu-rambu’, ’petunjuk’ manang tudutudu dia sidalanan, dia siihuthonon, dia siulahononhon dohot dia do sihaporseaon. Tontu, hata ni Debata do standarisasi di ngolunta songon halak Kristen hita, jala mutlak holan Debata Sitolu Sada i do, na patut haporseaonta. Molo nunga jumpa on di ngolunta, ndang tagamon be hita lilu di pardalanan ni ngolunta.

Tontu, ianggo angka pangunjunan i, sai na songgop do i di ngolunta. On do didok Jesus taringot tu si ‘Dungo jala martangiang! Dungo ma hamu jala martangiang, asa unang hamu bongot tu pangunjunan, ai na girgir do nian tondi i, alai gale do ia daging! (Mat. 26:41). Tajou ma Debata jumpa tarunjun hita.

Iklan

2 respons untuk ‘Jou ma Debata jumpa tarunjun

  1. R.J. Hutagaol 9 Juni 2010 / 10:30 am

    Pendekatan teks yang sangat baik. Terimakasih.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout /  Ubah )

Foto Google+

You are commenting using your Google+ account. Logout /  Ubah )

Gambar Twitter

You are commenting using your Twitter account. Logout /  Ubah )

Foto Facebook

You are commenting using your Facebook account. Logout /  Ubah )

w

Connecting to %s