Sermon HKBP Serpong

MAMUJI HABALGAON NI DEBATA
Psalm 8:2-7

Buku Psalm (Mazmur : Indonesia; Psalm : Inggris; Mizmor/Tehillim : Heber/Ibrani; Psallo/Psalmos : Gorik/Yunani) ima sada buku na marrumangkon/marisihon ende, tangiang, andungandung, pujipujian, hamauliateon, las ni roha, olopolop, panindangion haporseaon tu Debata. Ia turpukta sadari on ima marrumanghon ende pujipujian taringot tu habalgaon ni Debata mangatasi angka jadijadianna.

1. Ayat 2 :
Ale Jahowa, Sigomgom hami. Mansai sangap do goarmu di liat portibi on, dipatimbul Ho do hamuliaonmu ro di atas ni angka langit.

Borhat sian pengalaman ni parpsalmen dipuji ibana do Jahowa marrumanghon ende manang psalm. Diendehon ibana do pangalaho ni Jahowa na songkal i. Lapatanna dipuji parpsalmen do hadirion ni Jahowa songon Pargomgom di saluhut manisia. Ndang adong na so ginonggoman ni huasoNa, tung luhut do jolma i. Tarbarita do goar ni Jahowa Sipargomgom di liat portibi on. Jala barita hasangapon do di Goar ni Jahowa. Dipatimbul Jahowa do diriNa, asa tung ditanda, diboto jala dihatindanghon liat portibi on hamuliaon ni Jahowa na mangatasi angka langit.

Denggan do mamuji Jahowa marhite pengalaman ni ngolunta. Asa marhite na mamuji Jahowa lam ditopa ma dibagasan dirinta roha haserepon marnida pambahenan ni Jahowa. Laos alani na mamuji habalgaon dohot hamuliaon nang hasangapon ni Jahowa gabe tandaonta ma dirinta ise do di adopan ni Jahowa, ima jolma na metmet, na gale, naso margellok, naso dihadiha ni Jahowa, na ramun, jala pardosa. Marhite na mananda dirinta di adopan ni Jahowa, gabe pangasahononthon ma Jahowa di sandok ngolunta. Jala baritahononthon ma goarNa di liat portibion.

2. Ayat 3
Gari sian pamangan ni angka dakdanak dohot angka posoposo dijadihon Ho do paranganmu, ala ni angka na mangalo Ho, asa paonjaphon musu dohot sitahi sudolsudol.

Jahowa sandiri do hagogoon i, ibana do mual ni hagogoon tu sandok angka na mamuji Ibana. Gariada di diri ni angka na metmet, angka dakdanak, angka posoposo disuanhon Jahowa huaso hagogoon laho mamuji habalgaon ni Jahowa. Laos ido dipangke Jahowa laho paonjaphon angka musu dohot angka sitahi sudolsudol.

Tung saluhut do dipangke Jahowa laho mamujimuji habalgaonNa i. Disuanhon Jahowa do di diri ni sude angka manisia potensi pamujion tu Jahowa. Nang angka na magodang, na tumua, na gogo, na gale, gariada dohot do tu angka na metmet, angka dakdanak, angka posoposo. Dipasupasu Jahowa do angka i sude, asa tung mintop angka nabinoto ni angka parbegu na so tumanda Jahowa, dohot angka sitahi sudolsudol. Tapagalak ma di dirinta huaso pamujion na sinuathon ni Jahowa tu hita, laos disi do hagogoon ni Debata mangurupi hita maradophon angka halak na so tumanda Jahowa.

3. Ayat 4-5 :
Molo hutailihon langitmi, angka jadijadian ni jarijarim, bulan dohot bintang, angka na pinaulim. Tung aha ma nian jolma i, umbahen pola ditaringoti roham ibana? Jala anak ni jolma i, umbahen pola diebati Ho?

Disulingkit parpsalmen on do angka jadijadian ni Jahowa. Diparata ibana muse pamerengna tu angka na tinompa ni Jahowa. Jahowa do sitompa langit, bulan, bintang. Tung tangan ni Jahowa sandiri do na pauliulihon angka jadijadian i. Gariada tangan ni Jahowa sandiri do manggorga jolma i. Jala mangombushon hosa hangoluan tu ibana. Marhite tangan ni Jahowa do gabe adong jolma i. Tung so tarpatudos do jolma i tu hadirion ni Jahowa na marmulia i.

Mansai denggan do molo itatailihon tu angka jadijadian ni Jahowa. Mansai mangurupi haporseaonta do molo taingot jala taparata di rohanta angka jadijadianNa i. Gabe paingothon hita do i, huhut pasunggulhon pingkiranta nang panjaloonta di habalgaon ni Jahowa. Laos ido patubuhon roha na ra laho manghatindanghon dohot mambaritahon goar ni Jahowa na mangatasi sude angka jadijadian ni Jahowa. Ndang tama sasintongna jolma i laho paburnang dirina di adopan ni Jahowa. Tung so martudos do jolma i tu Jahowa. Pandohan, ‘Tung aha ma nian jolma i…’ mandok na so tarpatudos jolma i tu Jahowa. Sotung adong jolma i mambuat hasangapon ni Debata, gabe dipatudos dirina songon Jahowa. Martimbanghon hasangapon ni Jahowa ndang tu aha ni Jahowa jolma i, alai, mansai arga do jolma i dibahen Jahowa. Jolma i do na mandabuhon dirina tu bagasan dosa dohot hajahaton.

4. Ayat 6-7 :
Humurang apala otik do ibana sian Debata dibahen Ho, alai ditalitalihon Ho muse hamuliaon dohot hatongamon tu ibana. Dipabangkit Ho do ibana gumomgom angka jadijadian ni tanganmu, sude do tahe dipatunduk Ho tu ibana:

Mansai arga jala mansai sangap do sasintongna jolma i. Mangihuthon parpsalmen ia jolma i humurang apala otik do ibana sian Debata. Pandohan on patoranghonhon taringot tu ‘imago dei’ ni Jahowa do jolmai. Gombaran ni Jahowa do jolmai. Gombaran i martudutudu tu pangalaho ni Debata na adong di diri ni jolma i, ima songon sifat, citra, tabiat dohot nilai-nilai na adong di diri ni Debata. Ditanomhon Debata do dibagasan diri ni jolma i huaso laho mangaramoti dohot mangarajai sude angka jadijadian ni Debata. Ndang diloas Debata jolma i, mamangke huaso na sian Debata laho pasudahon manang mengekploitasi angka jadijadian ni Debata. Baliksa, pingkiran dohot roha na mangaramoti asa sude angka jadijadian i mamujimuji Jahowa.

Dungi dilehon Debata do hamuliaon (kemuliaan) dohot hatongamon (hormat), asa dijagahon jolmai dirina di jolo ni Debata. Asa unang rambuse (asal-asalan) jolma i di ngoluna. Alai, ingkon tongam jala marmulia di nasa pardalanan dohot panggulmit ni ngoluna. Tarlumobi, sangap laho mandapothon Debata. Molo didok pe ia jolma i ‘humurang apala otik – hampir sama’ sian Debata, alai ingkon taingot do songon dia pe pistarta, gogonta, sangapta, moranta, alai anggo hita tong do jolma. Ingkon patuduhononta do haserepon dohot pangoloionta tu Debata, ima jolma na sai manghirim di asi ni roha dohot di haluaon na sian Debata. Dibagasan diri ni Jesus Kristus nunga lam tangkas be di hita, ia jolma i tarlumobi angka na porsea i mansai arga do di Debata, pola sahat tu na mate Jesus manghophopsa. Amen!

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s