JUARABAGAS (uluan) HAPOSAN DI DEBATA

2 Musa 18:17-23

1. Mansai ampit do turpuk epistel on tu ombas taon hajuarabagason di tonga ni panghobasion ni hurianta HKBP. Ai dipatorang do di turpuk on songon dia si Musa uluan manang songon sahalak juarabagas maradophon bangso ni Debata dung ditangihon ibana hata ni simatuana doli si Jetro.
2. Jetro ima simatua doli ni si Musa, sahalak malim di Midian. Si Musa muli tu boru ni si Jetro na margoar Zippora (2:21). Na porsea tu Debata do si Jetro on. Tarida do sian panjaloonna jala panghatindanghononna taringot tu habalgaon ni Debata paruarhon bangso Israel sian Misir dohot si Musa. Dipatuduhon do i marhite na hehe pasahathon peleanna tu Debata (18:12), dung dipuji ibana Debata: ‘…tumongam hape Jahowa sian nasa angka debata…(18:11).
3. Songon sahalak juarabagas (uluan) si Musa, di sada tingki borhat do ibana mandapothon bangso i, laho pasahathon uhum. Somal do on diulahon ibana i sian mamungka manogotna i sahat tu botarina. Hundul do sahalak ni si Musa manguhumi bangso i. Ro di hata na balga nang hata na metmet manang di angka parsualan na balga nang na metmet tu ibana do dipasahat bangso i asa dipatupa uhum, dipatihi jala dipodai dohot hata ni Debata. Ndang adong mandongani ibana, sandok tu ibana ma ampe na sa ulaon i.
4. Dimatamatahon si Jetro do pangalaho na ni ulahon ni si Musa on, gabe didok ma: “Boasa sasada ho hundul, jala sandok bangso i jongjong di jolomu sian manogot ro di botari? Ndang denggan na binahenmi! (18:14,17). Asa bolas dohononta, pamodaion ni si Jetro di turpuk on tu si Musa ima na borhat sian holong, sian haporseaon tu Jahowa, dohot sian hajongjonganna songon natoras do mamodai ianakhonna asa tongtong mardalan di lomo ni roha ni Debata.
5. Songon sahalak Malim si Jetro diatusi do ruhutruhut ni panghobasion di bagas joro. Asa impola ni pamodaion i ima: asa dipatupa parsagi ni ulaon na denggan hombar tu balga dohot bidang ni ulaon sihobasan. Rumang ni parsagi ulaon na nidok ni si Jetro ima: Marsasaribu, marsasaratus, marlimapululimapulu, jala marsasampulu. Atur do parsagina hombar tu torop dohot balga ni ulaon. Alai tongtong do dipajamothon pangalaho ni ulaon i. Molo hata/parsualan na maol do pasahatonna ma i tu si Musa. Alai molo hata na metmet/parsualan na metmet do, bolas ma dipasahat tu angka juarabagas/uluan marsasaribu, marsasaratus, marlimapululimapulu, jala marsasampulu.
6. Dipamanat si Jetro do ndang denggan molo holan sahalak mangulahon sude ulaon. Dumenggan do molo sude mulaulaon hombar tu parbahir ni ulaon na sahat tu ibana. Jala ingkon haposan do ibana di nasa ulaon na sahat tu ibana. Ringgas mulaulaon. Asa dapot pangalaho si songon i, dipajamothon si Jetro si Musa di pangalaho na naeng jumpang di angka na naeng gabe juarabagas/uluan mangurupi ibana, ima:
– Baoa angka na marsihohot marroha jala angka na manghabiari Debata.
– Baoa parroha na sintong jala angka na manghagigihon pangomoan na so turut.
7. Marhite pangalaho on gabe dapot ma angka juarabagas na tang. Lapatanna: magodang di roha na pantas dohot hapolinon ni haporseaon. Asa, ndada utokutok na pinatujolo. Jala, ndang sae jala ndang denggan molo holan utokhutok pangasahononhon. Songon ima sahalak juara bagas haposan. Molo taida aha do sangkap ni parsagi ni ulaon i? Parsagi ni ulaon na atur patauhon nasida padimundimun hajongjongan ni bangso i na lam tu toguna jala lam tu risna di panghobasion.
8. Sude do parhalado dohot ruas ni huria gabe juarabagas di adopan ni Debata. Songon juarabagas haposan, tarjou do huria patupahon songon pinatupa ni si Musa. Marsagi di angka ulaon na ronsot jala na balga di tongatonga ni huria, patauhon huria i bolas mangulahon saluhut ulaon panghobasion dohot denggan. Ndang ombas na be huria pagukgukhon ulaon panghobasion tu sasahalak alai boha do boi rap marhobas, marsiadu patupahon ulaon na denggan. Impolana ima pambohalion/pemberdayaan. Hombar tu AP 2002, sude do hita parhalado, ima parhalado partohonan dohot na so partohonan. Siala sude do parhalado ingkon sude do hobas tu nasa ulaon di tongatonga ni huria hombar tu parsagina naung ni aturhon. Ndang denggan molo parhalado partohonan so pasiat ruas manghobasi huria. Sabalikna ndang denggan molo ruas ni huria mandok: Ndang ulaonnami i, ulaon ni sintua do i manang ulaon ni Pandita do i, manang ulaon ni parhalado do i. Dohononta ma: Ulaonta sude do i, siala sude do hita juarabagas di Debata (pat. 1 Kort. 4:1-2).
9. Alai, unang ala ni ringgasna gabe dohot ulaon ni donganna pe diula. Lapatanna, ulaon ni dongan do i, alai sai i diula, hape ia ulaonna so diulahon. Boi do i gabe hasosogo jala sikhammabarbar di sada punguan/huria. Asa unang songon umpama ni halak hita na mandok:
Manortori do pidong silogologo
Alai ditortori do naso asarna
Jotjot do gabe halak hasosogo
Na marnortori na so gondang na
Alan ii, ingkon jumolo do gabe haposan hita di angka ulaon na sahat tu hita, ipe asa taida dia ma angka ulaon na so singkop dope. Laos on do na ginoaranna masiurupan.
10. Antong songon juarabagas di Debata naeng ma ingkon tahangoluhon parange:
– angka na marsihohot marroha,
– angka na mangkabiari Debata,
– baoa parroha na sintong,
– angka na mangkagigihon pangomoan na so turut.
Molo jumpang do on di tongtonganta, lam togu do hajongjonganta songon huria molo dapot parsagi ni ulaon na lam tu rentana. Amen!

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s