Sieahanta

Renungan Harian – 19 Jan 2010

Rom 14:19

Dibahen i taeahi ma na tau padamehon jala pauliulihon hita sama hita!

Adong dua tona ni Debata maniroi hita marhite HataNa sadari on na pinasahat ni naposoNa Apostel Paulus, ima:

  1. Mangeahi HADAMEON. Didok Apostel i: ‘…taeahi ma na tau padamehon…’ Sasintongna, ndada holan Apostel Paulus na umboto tung mansai tabo do molo dame, mardame. Jala, ndang holan ibana na mangharingkothon i. Alai, sude do jolma mangharingkotan hadameon. Nang na tangkang, na burju, na pogos, na mora, na gogo, na gale, tung luhut do mangharingkothon i. Haru pahanpahanan ndang lomo rohana molo sai masisarbutan nasida. Hadameon manggombarhon panghilalaan na sonang, tabo, denggan, ture, dame, atur dohot angka lan na asing na mambahen panghilalaan marlas ni roha. Di bagasan hadameon ndang be jumpang angka na masitihaan, pangiburuon, panenganengaon, paburnang diri, manarihon dirina sandiri, pangkilalaan na gumogo sian dongan, lea mida dongan, dna. Siala ni i do di tiroi hata ni Debata on hita, asa taeahi ma hadameon i. Gabe si eahi hadameon ma hita di tongatonga ni bagasta, luanta, ulaonta, parsaoranta, punguan marganta, tarlumobi ma di tongatonga ni hurianta, nang songon i di tonga ni bangsonta. Didok Jesus do tu hita: ‘Martua ma sibahen dame, ai goaron do nasida anak ni Debata! (Mat. 5:9).
  2. Ulaon PAULIHON. Molo borhat hita sian hata partubu na  ima: ULI. Diparhataan na asing didok: bagak, denggan. Molo tapahombar muse dohot hata na asing na dos tu si ima: lambok, dna.  Tontu, angka na so uli do sipaulion, ima na sega, na so denggan, parbolatbolaton, marbada, marporang, masitihaan, masihosoman, masileaan, dohot angka na asing angka na so mambahen dame. Angka on do si paulion. Ise do na paulihonsa? Ima angka na mangharingkothon angka nauli. Ise ma i? Sude jolma! Tarlumobi ma hita songon angka na porsea tu Debata. Halomoan ni Debata ima angka nauli na denggan. Sialani i, molo tapasaut do ulaon pauliulihon, na marlapatan do i, pasauthon lomo ni roha ni Debata.  Hata ni Debata do sinjatanta laho pauliulihon. Ai didok do: ‘Ai nasa Surat i, sinihathon ni Debata do; jala hasea mamodai, maminsang, pauliulihon, manogunogu di bagasan hatigoran (2 Tim. 3:16). Sialani i songon halak ni Debata hita, taeahi ma na padamehon dohot na pauliulihon. Amen!

2 thoughts on “Sieahanta

  1. zending 19 Januari 2010 / 6:44 am

    alai unang ma songon na jotjot di hata ni sermon ate… molo adong ulaon naso saut mintor didok do : “sipareahan” ma i, hape so diulahon🙂

    • Parjumpanganta 19 Januari 2010 / 9:39 am

      Haha, ima da, sai anggiat ma di sermon taon 2010 on gabe margonti: ‘taeahi ma jala pintor taulahon ma’

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s