Bahan Sermon Parhalado

HKBP SERPONG 15 Juni 2010

UNANG BONSA ROHA !
Jangan gelisah !

Ev : Johannes 14:1-3

1. Patujolo :
Molo tajaha angka ayat na sabindu on, na parjolo tubu di rohanta ima Hasitolusadaon ni Debata. Nian molo tajaha Bibelta i, ndang adong tarsurat disi hata hasitolusadaon. Alai, dipatorang Bibel i do disi hataridaanna songon Debata Ama, Debata Anak dohot Debata Tondi Parbadia. Tolu panggoaran alai sada do na tinuduna ima Debata Jahowa.
Ia turpukta sadarion digombarhon do hasadaon ni Debata Anak dohot Debata Ama. Dohot hata na asing dohonon mananda Debata Ama di bagasan diri ni Jesus Kristus.

2. Hatorangan ni turpuk :
1. Unang ma bonsa rohamuna!

Hata ni Jesus do on tu angka siseanNa, di tingki jonok ne ma arina naeng marsirang Tuhan Jesus dohot angka siseanNa i. Marsirang mangihuthon pardagingon, ala naeng borhat ma Ibana mandapothon habangsaNa, mulak tu inganan haroroanNa. Molo na saleleng on nunga rap, alai molo ro tingkina marsirang tontu olo do tubu biar, lomos dohot ganggu ni roha. Jala, di pamerengan ni angka sisean i, Tuhan Jesus do songon uluan di punguannasida. Molo marsirang dohot uluan boi do gabe bonsa roha ni ruas i. Tangkas do dipanghilalaahon Tuhan Jesus situasi on, alani i do didok Tuhan Jesus tu siseanNa i asa unang bonca rohanasida ’Jangan gelisah’.
Naeng dohonon ni ayat on, nang pe tadinghonon ni Tuhan Jesus angka sisean i, alai holan sian pardagingon do nasida marsirang. Tutu ndang be rap nasida dohot Tuhan Jesus marhite pardagingon (secara pisik jasmani), ndang be rap nasida songon na sai laon rap mangan, minum, manjala dengke, rap modom, rap mardalani, dna. Alai, marhite partondion nang sirang nasida dohot Tuhan Jesus. Tongtong do Ibana rap dohot angka sisean i, saleleng porsea nasida tu Debata Ama. Ai sada do Anak i dohot Ama i. ’Porsea ma hamu di Ahu: Di bagasan Ama i do Ahu jala di bagasan Ahu do Ama i…(ay.11). Jadi ndang tarsirang panghaporseaon tu Debata Ama dohot tu Debata Anak. Ala ni i diondolhon Tuhan Jesus tu angka siseanNa i unang bonsa roha nasida.

Marhite pangantusion on, ndang jadi bonca roha ni angka na porsea mandalani ngoluna di portibi on. Saleleng sintong porsea tu Debata, sai na monang do hita maralohon portibi on. Sai na margogo do angka na tutu porsea tu Jesus Kristus nang tu Debata Ama, di angka na pasauthon lomo ni rohaNa. Toho mansai godang do ni adopan ni angka na porsea i angka hangaluton, parungkilon, arsak suang songon i di angka ulaon na borat saleleng di hasiangan on. Alai, tongtong do margogo ibana mangadopi saluhutna i, asal ma di bagasan haporseaon na sintong tu Debata.

Naeng lam tangkas di ngolu ni huria, ruas songon i nang parhalado, na so sirang pandonganion ni Tuhan Jesus di ngolunta. Baliksa, dihabuashon Debata do pasupasuNa tu angka na marsihohot, marsitutu dohot na so sumurut haunduhon dohot ringgas ni rohana mangoloi hata ni Debata. Ala ni haporseaonta tu holong ni Debata dohot tu asi ni roha ni Tuhanta Jesus Kristus dohot tu Tondi Parbadia ndang sai bonsa be rohanta, ndang sai ganggu be rohanta binahen ni panosak ni ekonomi, binahen ni ulaon na borat, dohot di sude parungkilon na songgop tu ngolunta.

2. Tuhan Jesus do paradehon inganan di angka na porsea
Lam tangkas do tu hita marhite ayat on, ndada portibi on inganan ni na porsea, alai di inganan na pinarade ni Tuhan Jesus do, ima bagas ni Debata ’bagas ni Damang’. Di tingkina tadinghononta do portibi on, borhat mandapothon bagas ni Damang. Angka ise do na patut bongot tu bagas ni Damang i, tontu holan Tuhanta Jesus do na umboto i. Alai, dipabotohon do tu hita, molo porsea hita tu Ibana bongotanta ma Bagas ni Damang i. “…Ahu do dalan i dohot hasintongan dohot hangoluan. Ndang adong na sahat tu Ama i, ia so marhite sian Ahu (ay. 6).

Tontu, ndada holan porsea boti, porsea holan di pamangan sambing, alai ingkon gabe daging do haporseaonta i. Lapatanna, ingkon mewujud do i marhite na tarida sian pangulaon, panghataion dohot pingkiran na denggan songon parbue ni haporseaon tu Debata.
Molo didok Tuhanta Jesus: ‘Torop do inganan di bagas ni Damang’, ingkon gabe motivasi do on tu angka halak naung porsea manang huria laho marsitutu marbarita nauli asa lam tu toropna angka na porsea tu Debata, na bongot tu Bagas ni Damang. Debata do na parade inganan hasonangan di hita muse, asal ma porsea hita. Nang di partingkian saonari on pe, Debata do na satia mangalehon hasonangan di hita. Disarihon do ngolunta siganup ari, diparorot do hita uju ro arsak ni roha, dipatureture do ngolunta uju bonca rohanta. Uju loja jala soratan hita di ngolunta, Ibana do pasonanghon hita. HataNa do mandok: Ro ma hamu tu Ahu, hamu angka na loja jala na sorat, asa hupasonang hamu! Jangkon hamu ma augangku, marguru ma hamu tu Ahu, ai na lambok do Ahu jala na serep marroha, asa dapotan hasonangan tondimuna. (Mat. 11:29-29).

Laos gabe sada apulapul do turpuk on tu hita, uju marsitaonon hita ditadinghon donganta sian portibi on. Dibagasan haporseaon, Debata do mangalap angka na porsea i, asa mambongoti surgo hasonangan i. Jadi, uju di portibi on do pe angka na porsea, nunga diboto tudia ibana borhat. Uju di portibi on dope angka na porsea i, nunga adong hian diparade Tuhan Jesus na gabe inganan hasonanganna ima di Bagas ni Damang. Antong ndang jadi bonca roha ni angka na porsea i, nang pe jotjot jala borat mangadopi paraloan sian portibi on, alai hasonangan di ujungna. Amen!

About these ads

Berikan Balasan

Isikan data di bawah atau klik salah satu ikon untuk log in:

WordPress.com Logo

You are commenting using your WordPress.com account. Logout / Ubah )

Twitter picture

You are commenting using your Twitter account. Logout / Ubah )

Facebook photo

You are commenting using your Facebook account. Logout / Ubah )

Google+ photo

You are commenting using your Google+ account. Logout / Ubah )

Connecting to %s